ضحكوعلينا يكولون مقاومة..لا يستبعد ان يلتحق بشقيقه امجد الدهامات: كتلوه المليشيات القذره الي كل العراقيين يعرفونهم!

وجه محمد الدهامات شقيق الناشط المدني الذي قتل في ميسان أمجد الدهامات رسالة اتهم فيها مَن وصفهم “بالميليشيات الوقحة” باغتيال شقيقه، محملاً مسؤولية ذلك إلى قيادة الشرطة في المحافظة، والتي قال إن شقيقه أمجد قُتِل على بعد أمتار من مبناها.

وقال الدهامات في رسالة نشرها باللهجة العامية على صفحته اليوم 9 تشرين الثاني 2019 إن قيادة شرطة المحافظة تضم 30 الف عنصر، لكنها عجزت عن حماية شقيقه، “لأنه قائدها دمج”.

وأضاف أنه “لا يستبعد أن يلتحق بشقيقه”.

وجاء في نص الرسالة:
كتلو اخوي امجد
كتلوه ويتمو اطفاله الأربعه
كتلوه وكسرو ظهر امه وابوه الي اعمارهم تخطت ال ٨٠ سنه ونص امراض الدنيا بيهم
كتلوه وحرموني اني واخوانه واصدقائه والعماره كلها منه
كتلوه على مسافه ٥٠٠ متر من قيادة شرطة ميسان
الي بيها اكثر من ٣٠ الف شرطي بس اكيد هذا العدد مو فعّال لان ببساطه قائدهم دمج
كتلوه لسبب واحد وبس ..لانه يخالفهم بالرأي من خلال حظوره بكل التظاهرات الي اطالب بحقوق الناس
كتلوه المخانيث اصحاب الكواتم وخفافيش اليل
كتلوه المليشيات القذره الي كل العراقيين يعرفونهم بس محد يجرأء ويذكرهم بالاسم والناس حقها لان تخاف على حياتها منهم..انا اليوم راح اذكرهم بالاسم واعرف هاي رصاصة الرحمه على حياتي
كل المليشيات المسلحه بالعراق قذره ولا استثني منها احد سائرون وبدر والعصائب والاوفياء ووو
وكل الاحزاب الي تحكم العراق عدها كواتم لتصفيه الي يخالفهم بالرأي او يزاحمهم على عقد او مناقصه
ضحكو علينا وگالو جبنالكم الديمقراطيه
وهمه دكتاتوريتهم اسؤ بالف مره من صدام
ضحكو علينا من يگولون احنا فصائل مقاومه وهمه عباره عن شركات تجاريه همها الربح وبس
ويشبعون ضحك كل ما يسقط شهيد من عدنا او جريح
بس صدگوني هاي الدماء الها حوبه
وراح يجي اليوم الي ينتصر بيه الحق
واذا تتصورن انكم بقتله راح تسكتون صوته فهذا غباء راح يضيف لغبائكم .. وراح يبقى مثل ما بالصوره ادنا يأشر عليكم بأصبعه وعلى وجهه نفس الابتسامه المعهوده ولسان حاله يگول اني الي فزت وانتو الي خسرتو
لان امجد فكره ومبادئ والافكار والمبادئ ما تموت
امجد بذره وطاحت بأرض خصبه وانبتت مئات او آلاف مثله واحسن منه وهمه ذوله الي راح يهددون عروشكم ويسقطوها
شراح تگولون لله بيوم القيامه يامن تدعون انكم احزاب اسلاميه وتدعوّن التدّين
راح يكون خصيمكم امجد واخوانه الشهداء والجراحى يوم القيامه
وراح يواجهكم امجد بقميصه الابيض الي لطختوه بالدم وسويتوه احمر
اخوي الي اخر مره شفته بوجهه الي يضحك كالعاده ووراهم بساعات غسلته ودفتنه بأيدي
ما اگول غير الف رحمه على روحك وانتظرني اني جاي وراك

اغتيال الناشط المدني امجد الدهامات في ميسان

امجد الدهامات
امجد الدهامات

اترك تعليقاً

لن يتم نشر عنوان بريدك الإلكتروني.