كل سطح بديچه

 

 

 

 

 

 

 

 

 

 

فد يوم ببرج الدجاج صارت عركة على العلف وصارت اجلكم الله بالنعل واحد يلخم الثاني، وكل ديچ يگول اني وبس عرفي احمر ولغاليغي تسوة عدالها، المشكلة انو الديوجة مجاي تفهم انو كلها عدها عرف احمر بلون الدم، ومابيهم احد عرفه ابيض حتى الي محجب عرفه وضامه جوه عمامة سوده او بيضة هم نفس الشي هو عرف احمر٠

وحتى ناس تخوف ناس جانو يمسحوها بدم الكتاكيت، طبعا يكفي ان يكون هناك خلاف بين اي ديچ واخر حتى تشوف الكتاكيت متسلحه وطالعه تهتف باسم الحزب والديچ الاكبر، وبعد انتو تعرفون الانواع تختلف بيناتها وكل سطح وديچة يعني هراتي يختلف عن  الكوجن يختلف عن العربي ويختلف عن ديچ مال شركة يعني  حسب كل  وسطح شوف  شيحوي وبذاك الوقت نگدر نتصور الوضع شلونه٠
المهم اكو ديچ صعد على اعلى برج وصوته عالي من يعوعي وخصوصا يوم الاربعاء جيب الي يكله بمنگاره يابه صوتك نشاز وجاي يزيد النار حطب، ماكو خطية هذا الديج بس لا فد يوم يتنددل من السطح مثل الديچ القبله٠
الله شاهد ديوچتنا محافظة على صلاتها الخمس وعلى توثيق هاي الصلاة، بس ما اعرف هاي الديوچة تدري انو صورها وهي ساجدة  فتنة تثير الشهوات عند الدجاجات!؟

وحافظين القرعان صم على كلوبهم وكل انواع الادعية  حتى دعاء الزواجل الله شاهد ومايخلون مناسبه او سؤال اذا ما يجاوبون باية هطولها وطبعا كلمن وقرعانه لا عبالكم هم ما حافظين زين لا عيوني كلمن وقرعانه٠
نرجع لديجنا فدوة لعينه جان يكول للوياه انو هو حيحفظ نوعهم من الانقراض وانو الديوچة مال ذاك الصوب على عداء تاريخي وي ديوچة هذا الصوب والمعركة مصيرية ويجب تطهير المنطقة، من كل واحد يطلع راسه ويگول جوعان او عريان او بردان او الحگونا جثثنا تكومت بالشارع، من الجوع بدينا ناكل بعضنا البعض وتهنا بين البلدان، ياويله الي يگول هيج٠
الملفت بالامر انو هالديج جمع داير مدايره شكو ديج يهوسله او حاط رشمة بحيث ماعنده غير يعبي بسكلته رگي، ومن بين هالديوجه ديچ هم قائد لعدد من الكتاكيت او الفراريج الي ما بقت واحد ما تلطخت بدمه وما بقت فقير ما اكلت خبزته، ومن يطلع هالديچ يكول وين اكو فقر بسطحنا!!

صدگ سيادة الديچ بروح امك والعشوائيات !! يمكن ديچنا عنده قصر نظر او مجاي يشوفهم كلشي يصير٠
هالديچ اخو خيته وراد من كل گلبه ان يوقف مجرشة الموت الي دايره بزوده وبزود شركائه من ذيج الصفحة وجان ذجيبولنا اريلات، شنو قصة هاي الاريلات!!؟
اني اكوللكم هاي الاريلات تحمينا وتدور على الشامبو و الريحة و الزاهي شعبالكم احنا ديوچتنا يخافون علينا من الفتنه وهالسوالف تأذي البشرة وهم يخافون على بشرتنا، بحيث فدوة لعينهم يكفروك باليوم الي تشتري بي صابونه٠
اما موضوع ولائه للناس الغربة لا تعد ولا تحصى بحيث الف الحمد لله جاي يشتغل ان يسوي سطحنا نموذج للسطح الي اجه منه وطبعا من يحجي عن تاريخه طبعا راسا ينافس الامام علي على مكانته، خطية الامام تحمل الجوع والقهر وما گال باطل ولا اخذ مال حرام ويجي الديچ ينافسه على مكانته!!

مادري اذا كان هذا كفر او لا بس عد الحواوين كلشي جائز٠
ديجنا ابو عرف احمر وتاريخ ناصع مثل لون وجهه، ماخذ البرج فلاح ملاچه هو وولد عمه بحيث من تفوت تحس نفسك داخل بمضيفهم ومتفضلين عليك لان انت مو منهم وداخل لمكانهم٠
نسيت اكولكم الديچ الچبير قسم السطح لاقسام ووزعها على الديوچه الباقين والديوچة الباقين كلمن جاب كتلكيته وكتاكيت اخوه ولعبو شاطي باطي٠
طبعا ديچنا ابو تاريخ ابيض وعرف احمر الي دنحجي عنه عنده عنده منجزات لا تعد ولا تحصى اخرهم انو كتكوته الغبير والي معتبر برج بغداد الدولي ملك اله،

بس الحق يقال هالكتكوت ما يصعد بطيارات البالة الي جابهم ابو هاي ولا يركب بطيارات دعاء وعثاء السفر، لان ما يصير نجمع الوعث بطياره وحده،

المهم هذا الكتكوت الصغير المدلل ابن ابو عرف جميل وتاريخ ابيض  رجع طيارة الجيران منا لهناك لان جانو توهم مبلشين بكنس المقلع فخلو الطيارة ترجع علما يمسحون علما ينشف يابه مو صوچه الحواوين تريد تستقبل الناس بمطار نظيف بس مو صوچك وحياة جدك سيادة الديچ

والله صوچنا لان ما نعرف قانون الحواوين قسم الديوچه اسفين لان دوخناك، وما اتشرفنا بطلتك البهية على الشاشة وانت تعوعي بصوت نشاز، يمكن من التعب لان انت مستلم مسؤلية مال مطي بس انت كدها وگدود ونعتذر لكل كلمة ضوجتك سيادة الديچ، وانتو بس كافي تهوسون٠
وبين سالفة الاريل الي راح ضحيتها اني وانتو ومساكين هذا الصوب وذاك الصوب، بقت ديوچتنا تعوعي وتتناگر بيناتها وبس الضروگ علينا مو كتلكم كل سطح بديوچته .

نور القيسي
nooraalqaissi@yahoo.com

 

 

 

 

اترك تعليقاً

لن يتم نشر عنوان بريدك الإلكتروني.