صينية زكريا

 

ام ارزوقي الله يرحمها ما كان يصير عد ابنها الچبير ويلاد ومن حرگت گلبها اجتي ببيت بيبيتي مثل هيج يوم قبل ثلاث وعشرين سنة اخذت شمعه من صينية زكريا مال بيت بيبيتي  ونچخت بيها دنبوس ابو راس ونذرت اذا رزوقي صار عنده جهال راح تسوي صينية لزكريا كل سنة٠

مرت سنة واذا برزوقي يصير عنده توم ولد وبدت ام رزوقي تسوي صينية زكريا وتطلعها بالشارع ونلتم احنا الجهال داير مدايرها وتجي النسوان الي عدها غايب وتريده يرد والي ما متزوجه والي ماعدها بزر، وكأنو زكريا المعمدان يصير بذاك اليوم ابوهن الي يشتكن عنده٠
اعذروني اخذني الكلام ونسيت اسولف على بيبيتي شلون كانت تحضر لهذا اليوم، طبعا بيبيتي چانت كل دورة سنة تكعد تحسب يوم يوم لاول يوم احد من ايام شعبان لصوم زكريا طبعاقبل اسبوع بيبيتي تشتري طول قماش بازه مخطط يفترض ان تختلف بصمة قماش البازه بين الولد والبنيه بس الحصار كافر واحنا هوايه لذلك تاخذلنا طول واحد مخطط وتسويلنا منه دشاديش وبجايم للولد، وبعد طقس خياطة الملابس  تاخذنا وياها لسوگ العباسين او سوگ المخضر بالاعظمية تشتريلنا كل واحد تُنگة صغيرة ودنبگ وتشتري حلويات والات الدولمة والشموع وشرايط ملونه، والاهم من هذا انو نروح لحديقة النعمان نكطع يآس او نروح نطلب من حراس المدارس ان ناخذ ياس من حدايق المدارس، لا تستغربون رغم القهر بذاك الوقت بس كانت مدارسنا بناء مو طين وكان بيها حدايق وورد ٠
بيوم زكريا الي حصل مرادها او الي عدها نذر تصوم وبعضهن تصوم حتى عن للكلام وفي حالة المرض او السفر تستأذن وحده تصوملها هذا اليوم وتسوي صينية زكريا لوجه الله تعالى٠
طبعا نسوان الطرف كلش حريصات على احياء يوم زكريا وحتى بيبيتي الي چانت معروفه بقوتها ولسانها الباشط كانت تتحول الى صامته بمثل هذا اليوم  طبعا الي يضوجها مراح يخلص من الاشارات والنظرات الغاضبة ويا ويله وسواد ليله اذا لگفته بعد الفطور الا تنبش اجداد اجداده اذا تلزمه٠
المهم نرجع لام رزوقي الي جانت الله يرحمها حيل عرمه بحيث چنتها كد ما چانت تخاف منها وماتصير حامل، بس تدرون كأنو الله هداها وره ما صار عدها حفيد يمكن التهت بي، المهم بذاك اليوم نصبت ذيچ الصينيه ستيل تلهث لهث وعليها دنابك ثنين  مكلوبه وبنصها يآس وتُنگتين ام البلبوله لان اجوها احفاد ولد وشمعتين مزينه بشرايط ملونه وشمعه جبيره ملولوه بيها لونين وردي وابيض ونسميها شمعه العروس وبخور ولهوم (سمسم مدكوك ومسهي وياه شكر) بالاضافة للزرده والچكليت والحامض حلو والزرده وطبعا وكاسة صغيره بيها حنه علمود البنات الي ما متزوجات يتحنن حتى الله يرزقهن بابن الحلال وكاسة شكر وشوي تمن وملح٠
تجمعنا داير مداير وغنينا يازكريا عودي عليه كل سنه وكل عام اعلگ صينيه وطبعا ندگ بالدنابگ مالتنه ومن نشعل الشموع تبدي النسوان الكبار تصيح على الامهات الجديدات (منيه عدها نذر خلي تجي تاخذ شمعه، منيه ما متزوجه خلي تجي تحني، منيه تريد بزر خلي تجي تدنبس الشمعه، والله عليها الي تنجخ ابرة بالشمعه يهجم بيتها الي تنچخ الابره بالشمعه) كانو يعتقدون انو غرس الابره بالشمعه يجيب الشر والاذى للشخص الي تدعي عليه صاحبة النذر٠
اني امنيتي چانت اريد اصيد حية ام سليمان وهاي الاخيرة تشبه الابو بريص بس بي لمعه والوانه حلوة مو مقززة بس كلش سريع بحيث چنت اگضيها وراه مطارد وماصيده وشگد تمنيت الزمه وعيد بعد عيد انضافت امنيات ويه حية ام سليمان منها ان تطلعلي السحارة الي يخلوها باللعبه لان چنت اخلص فلوسي وتتكوم بجيبي بس نفاخات  بيبيتي چانت تگلي طلبي شي براسه خير لان نذرچ المابي خير ماله شمعه٠
ميخالف بيبي اتنازلت عن كل امنياتي اعلاه وماعاد الي بيها حاجة بس بيبي ممكن تاخذين نسوان الطرف والامهات الي ماتن بحسرة الفرحة والي تكصصو وتروحون تحچون وي الله الانبياء اي احد فوگ گولوله ما نريد شي منك بس نريد وطن يلمنا ممكن؟!

نور القيسي
nooraqaissi@gmail.com

 

 

 

 

 

اترك تعليقاً

لن يتم نشر عنوان بريدك الإلكتروني.