شريعة العتاوي

 

چان عدنا عتوي  اسمه چلمه، طبعا هو حفيد عتوي قبله اسمه ابو الليل او (لبلب) وچان حيل عزيز عد عائلتنا بحيث جان مشاركنا  فراشنا وحتى السفرة٠

چلمة يشبه جده من امه لبلب يعني اسود  يلمع وسمين يخبل وصماخه جبير وذيلة مدنفش، كبر چلمة و نكدر نگول صار عتوي من هذا المعتبر  حلم كل بزونة، يعني خلقه حلوة، وجده معروف بالمنطقة، وعائلة تعتني بي بالاضافة الى ذلك والاهم مما ذكر انو چلمة كان  جدا ملتزم بشريعة الهررة٠
بحيث البزونة الي ما تجي وياه يملخها كتل ويدزها لاهلها، ومن نحجي وياه يكول لا تدخلون، لان  بأعرافنا الهررية مسموح العتوي يضرب البزونة حتى يأدبها، او يجرها من ذيلها للفراش وما يحقلها لا تكعد على التيغة سفور ولا تتمشه على الحيطان وحدها، وما تحيص ولا تطالب باكثر من لگمة بطنها، ولا تنونو لان نونوتها عورة تثير الغريزة في باقي العتاوي وبما انو العتوي المؤمن عقله بين افخاذه فله الحق بخرمشتها ونعنعة ضلوعها، اما
المكان الي ممكن تكون بي وحدها من تنضرب بنعال او صوندة من قبل احد زعاطيط المنطقة او امهات البيوت وما دون ذلك فهو خارج الشريعة واعراف الهرورة٠
 طبعا احنا من نسمع شريعة نظل نطگطگ لان هاي تشريعات من العتوي الاكبر شلون نناقشها واحتمال يغضب علينا  اويقيمون على چلمة الحد، لذلك نسكت وونسحب بهدوء وتبقه ذيج البزون المسكينة تون  اليل كله  ميو ما ميووووو٠
طبعا لو نستعرض مميزات چلمة فتقريبا صفر چان بس اكل وشرب واعتداء على مطابخ الجيران،  الله يسلمه چان حسرة على وحدة تنسه الباب مال طرمة مفتوحة، اذا ما تلاگي چلمة مسوي هجوم كاسح ماسح على المطبخ ويوميه هرجة ببيت العرجة وكل هذا واحنة اهله نگول حيوان ميخالف احنا جوعنا وننطي العذر يرجع ياكل اكلنا وهم نكول ميخالف هذا عتوينا يحمينا من الجريدية والفار والابو بريصية، الحقيقة  انو اهم سبب لسكوتنا انو چلمة يذكرنا بجده (لبلب) وتعرفون  شنو يعني يكون العتوي ابن ولايتنا ابن ربيعتنا، والمثل يكول الشين التعرفه احسن من الزين الي ما تعرفه٠
فد يوم من الايام جيرانه جابو بزونة حليوة هواي اسمها ننش يعني لونها مخلوط الخاكي والجوزي الطوخ، وصوتها خشن حيل، عدا ذلك ما جانت تتعيب خطبناها لچلمة ما قبل بيها لان جانت من غير دين وصوتها خشن وچبيرة ويگول احتمال لاعبه وي عتاوي هوايه غيري٠
اني شخصيا مالوم چلمة لان حسب الشرع الهرري اذا چلمة تزوج ننش والي هي من غير ملة حيكون زواجه منها (just for fun)  واحنا عائلة ما تقبل ان يكون زواج عتويهم من بزونة الجيران للمتعه فقط طبعا مو حبا بالبزونة وانما مراعاة لحقوق الجار اولا، وثانيا والاهم درء مخاطر مصيادة ابنهم عن جامات شبابيكنا٠
المهم كولو هاي البزونة ننش اتزوجت عتوي اسمه سعدون ابن حلال وطيب، تعرفت عليه من جانت تتمشه من يم الكببچي الي بحديقة النعمان هناك اكو تجمع كلش جبير مال عتاوي، وحبلت وجابت مدري كم واحد ويوميه تنوگل بيهم من مكان لمكان بسبب زواجها من سعدون والي اعتبره البعض باطل واعتبرو اولادها مو شرعين، اي ياعيني شنسوي هذا الشرع هيج يكول يا ننش مو بيدينا٠
من جانت تصير مشاكل ما ياخذون ننش  شاهد على اعتبارها من غير ملة اولا وبزونة يعني شهادتها منقوصة المسكينة، جهال ننش يخبلون وهمزين صوتهم مو على امهم، ليش مو مصخم الوجه چلمة يعشگ بنت ننش الصغيرة، ويرابط على التيغة ليل مع نهار علمود الصغيرة يغنيلها وهي تتمضحك وتدخل جوة ركض يجيبلها شكو جريدي شكو فارة شكو عصفور اشكال چان مدللها، ابوها حس بالنگرة بس مدار بال لان دياكل براس الزوج،

ومن رحنا خطبناها اهلها ما وافقو وحقهم لان صغيرة، المهم چلمة توازة فد يوم نزل يمها يشمشم ويطخطخ بيها وهي تبعده بس من صارت صدگ ما گدرت تصده لان يعادل حجمها مرتين وبعدين چلمة سليل الحسب والنسب وگليط العتاوي بالمنطقة، فچان هيبة على الزعاطيط، وبذيج اللحظة وچان يلكفو ننش وسعدون ويلزموه لچلمة يملخو كتل، وراحو اشتكو عليه لان ما يصير الاعتداء على بزونة قاصر٠
گولو شالو بيت ننش وبقه چلمة يموت على الصغار ويگمز منا ومنا وبالظلمة، وبمرور الايام اتعرف على عتوي يخلف بهالبزازين ويزوج لچلمة على اعتبار ديستر بزازينه والي تموت جوه ايده والي تموت وهي دتجيب والي قتلت روحها، بس تدرون بي حيوان مرفوع عنه القلم وبالشريعة كل شيء يشبع الهوس الجنسي عند العتاوي مسموح٠
بذيج السنين جان القانون يمنع چلمة ان يتزوج بزازين صغار لكن اليوم

والفضل من الله اولا ووزير العدل حسن الشمري ثانيا، يگدر چلمة يتزوج وحده ويهد وحدة، واذا ما عنده فلوس فممكن يزوج بناته الصغار وياخذ مهرهم بجيبه بس هو شنو ما يقبل يزوجهن لان يعز عليه بناته جگر گلبه،

والشغلة الثانية الي خالته يلعب على كيفه، انو هو كان عتوي بطل مجاهد قارع الدكتاتورية من جان ينام على فراش مال اوادم وياكل كيك ونستله، بينما غيره عايشين على الزبل، لذلك انطو ثمن جهاده ضد السلطة في احضان بزازين اوربا والدول المجاورة  راتب ما يحلم بي احد، شلون ما ننطي وهو ابن الملة وسليل الاسرة الشريفة٠

نور القيسي
nooraalqaissi@yahoo.com

اترك تعليقاً

لن يتم نشر عنوان بريدك الإلكتروني.